أصله خلاص كبر علي الطبع ده و مش حيقدر يتغير
أصله أتربي علي كده
مهي ده عادته
معلش أستحملوني أصلي لما بتنرفز ببقي وحش قوي
خلي بالك ...أصله نصف كلامه شتيمة
لسانه مش حلو
غبي في تعاملاته
هو كده
أنا كده بقي لو كان عاجبكم ...و مش حتغير
أصله مبيحسش قوي بالناس اللي حواليه
هو دايما كده بيكسف الناس
من بره هاله هاله ...و من جوه يعلم الله
هو دايما كده يحسسك إنه عم المهم ..و مفيش بعده
يالله ..ده حالته صعبة خالص ..لو أتحط في موقع مسئوليه ..بيترسم علي الآخر
أصله كده وحداني و مبيعرفش يندمج مع الناس
صوته عالي و بجد كائن مزعج
ممكن يكسفك أدام الناس و ميعملش حساب لكرامتك علي الأقل أدام الناس
بيطنشك كتير و بيحب قوي ..يحسسك إن أهتمامك كله من جانب واحد
مش عارف يحب ربنا
لسانه مش رطب بذكر الله
عايش بلا هدف
مبيعملش خير
خناقاته كتيره مع كل اللي حواليه
.....................................................................................
مش راضي عن نفسك
معندكش قناعة بذاتك
دايما تبص علي اللي في إيد غيرك
مش سعيد في حياتك
نكدي
كئيب
ممل
مش عارف تستمتع بحياتك
مش عارف تعيش حياتك في طاعة الله
دايما منتقد من اللي حواليك
معندكش ثقة في حد
محدش عنده ثقة فيك
مش بتعرف تعبر عن اللي جواك
مش بتعرف تتعامل مع اللي بيعبرلك عن اللي جواه
شخصيتك ضعيفة
مركز علي جانب واحد من جوانب الحياة ..و ناسي إنها المفروض تتعاش كلها
مش عارف تترك بصمة في حياة غيرك
حاسس إنك لما تموت محدش حيفتكرك بحاجة حلوة
وجودك زي عدمه
أناني
قليل الأدب مع أهلك
مش عارف تحسس أهلك بأهمية دورهم في حياتك
منطوي
دايما تعمل حاجات تغضب ربنا و تقول أصل أنا كده
................................................................
بجد حاجة بتضايقني جدا ليه عندنا ثقافة أنا كده
هل هي أصبحت ثقافة مجتمع ؟؟؟!!!
طيب لو كانت ثقافة مجتمع جه منين المثل الشعبي اللي بيقول "أبنك علي متربيه و جوزك علي متعودية "
يعني إحنا عندنا إقتناع داخلي بإن الشخصية ممكن تتغير بالتعود
يعني مفيش حاجة أسمها
أنا كده
هو كده
طبعي كده
مش حتغير
بجد بتضايق قوي لما بلاقي الناس بتتعامل مع العيوب اللي في شخصيتها "و اللي ممكن تكون بتسببلها مشاكل كتير في حياتها "علي إنها أمر مسلم به و طبيعة شخصية و تربية
لأه و الأدهي أنهم كمان بيحاولوا يتكيفوا و يكيفوا كل اللي حواليهم علي الطبع ده
طيب ليه مبيحاولوش يعملوا العكس
ليه مبيحاولوش يغيروا الطبع الوحش ده للأحسن
هل هي ثقافة مجتمع ؟؟!!!
اصلها بجد حاجة غريبة جدااااااااااااااااااا
دايما بلاقي الناس بتتعامل علي إنها خلاص بقت كده ..و أتربت علي كده ...و بقالها مش عارفة كام سنة عايشة و هي كده
و تلاقيهم بيقولوا لغيرهم لو بتحبوني أقبلوني زي مأنا كده لإن أنا كده و مش حتغير
بجد بقي ليه كده ..مفيش حاجة أسمها أنا كده
في ححاول مبقاشش كده ..و حنجح ..و حتغير ..و حبقي الأحسن
لإن أنا مش حديد وصلب ..
أنا
قلب
روح
ضمير
معنويات
لو عندي مشاكل في عباداتي حلعب علي روحي لحد متتحل
لو عندي مشاكل مع اللي حولي حلعب علي قلبي لحد متتحل
لو عندي مشاكل في سلوكياتي حلعب علي ضميري لحد متتحل
لو عندي مشاكل مع نفسي حلعب علي معنوياتي لحد متتحل
وفي الآخر أكيد كله حيتحل
لإن ده قلبي أنا وروحي أنا و عقلي أنا و ضميري أنا و معنوياتي أنا
و اللي عاوز يتغير برده أنا
يبقي المسيطر علي الموضوع كله هو أنا
ليه بقي أسجن نفسي في سجن كده و خلاص
و أحرم نفسي من إني أبقي الشخص السعيد مع ربه و أهله و نفسه و اللي حواليه
بجد أنا نفسي في حاجة أوي
كلنا نتفق و أنا أولكم إننا دايما كل شوية ندور في نفسنا علي حاجة بتضايق الناس اللي حوالينا مننا أو حاجة بتضايقنا من نفسنا
أو بتبعدنا عن ربنا أو بتعكر علينا حياتنا
و نبدأ نشتغل علي نفسنا ..و نعودها علي الوضع الجديد
و الصفة الأحسن ...و بجد و الله و عن تجربة محاولة التعود حيتحول شوية شوية لتعود حقيقي و حنبقي طبعنا نفسنا علي السلوك الأحسن
بجد يا جماعة لازم نتعامل مع نفسنا علي إنها طفل صغير بنربيه علي إيدينا طول مإحنا عايشين معاه
لإنه مفيش مفر غير كده
لو مشكلي مع اللي حولي مهو كده كده لازم حعيش معاهم
لو مشاكلي مع نفسي بره حفضل عايشة عمري كله معاها
لو مشاكلي مع ربي حروح منه فين حرجعله في الآخر
و هي حياة واحدة بس اللي حعشها مع نفسي و مع اللي حوالي و اللي أدامي فرصة واحدة بس فيها علشان بعدها حقابل ربي و أتحاسب علي اللي عملته فيها
طيب ليه منبقاش أذكية و نلعبها صح
و نكسب حياتنا مع نفسنا و ربنا و اللي حواليا
لإنها كده كده متعاشة ....يبقي تتعاش صح بقي
بجد لو عملناها كده زي واجب شهري
كل شهر ندور علي صفة صغيرة عايزين نحسنها فينا
و نفضل نحاول الشهر كله لغاية بإذن الله منقدر نغيرها
و بجد لو في صديق يعين كل واحد منا في الواجب ده
مش لازم يعني يكون عارف الواجب اللي حعمله أصلا
أنا أقصد صديق يكون عنده الصفة اللي ناقصاني وأحاول أكتسبها منه لغاية متبقي عند ي
يعني مثلا :
أنا بجد كان مأزمني جدا إن ذكر ربنا مش في لساني دايما
حتي في كلامي العادي
يعني مثلا لو في واحدة في مشكلة كنت بقلها مثلا
فكي بس روقي كده و حتعدي ..حاجات كده
و كنت بتضايق قوي إن لساني مش واخد علي مثلا :
أستهدي بالله ،أستغفري رينا ،خير إن شاء الله
بس كان في واحدة صاحبتي الكلام الحلو ده دايما في لسانا
فركزت معاها قوي و حاولت أكتسب الصفة ده منها
و بجد الحمد لله ...لساني بدأ يآخد علي الكلام الجميل ده
يعني صفة وحشة اتبدلت بصفة حلوة ....
وهكذا .................
تخيلوا بقي لو أشتغلنا كده علي نفسنا كل فترة في صفة معينة
حنكون في الآخر عاملين إزاي
بجد ياريت نحاول
تحياتي
سلمي
