السبت، 18 يوليو 2009

حبيتك لإلتزامك



حبيتك لإلتزامك ................. حبيتك لاحترامك

حبيت فيكي التواضع ................. والعزة اللي ف كلامك

مبسوط منك لأنك ................. إسلامك كل همك

أنا أصلي قابلت بابا ................. واداني فكرة عنك

وسألته عن طباعك ................. إن كانت يعني هادية

فحكالي عن سماعك ................. لكلامه وانت راضية

وازاي بتسلي نفسك ................. بذكرك وانت فاضية

وحلاوة صوت تلاوتك ................. وازاي بتكوني شادية

وسألته إن كنتي فاهمة ................. معنى كلمة زوجين

قالي هتكونوا ورقة ................. مطبوعة نسختي

نغني كنت أو فقير ................. ليك عند بنتي دين

سرك هيكون في بير ................. معرفش مكانه فين

تفضل دايماً كبير ................. في نظرها حبتين

لو جيت بفلوس كتير ................. تطمن جت منين

هتكون دايماً معاها ................. سيرتك هتكون هواها

والشوق اللي ف خيالك ................. تلقاه لحظة لقاها

لو جيت زعلان ف مرة ................. إرمي همومك وراها

ومهما شوفت بره ................. مش هتشوف مستواها

واطمن يابني خالص ................. عقلها مافيهوش تفاهة

وزي ما هي بنتي ................. بنت حماتها وحماها

وسألته عن ولادي ................. منك هيكونوا إيه؟

قاللي هيكونوا عادي ................. فسألته يعني إيه؟

!قاللي العادي إللي كان ................. عند الناس من زمان

العادي بتاع سراقة ................. وحذيفة بن اليمان

العادي بتاع أسامة ................. وابن الحكيم لقمان

ده العادي بتاعنا إحنا ................. بنربي عليه عشان

لو جينا ولا رحنا ................. هنقابل الرحمن

عمرك ما تخاف عليهم ................. ولادك في الأمان

أنا بنتي هتربيهم ................. ع السنة والقرآن

هتشوف ابنك بيصحى ................. مادام سمع الأذان

ينزل في الفجر يقرا ................. بالسجدة والانسان

هتشوف في حجاب بناتك ................. العفة والإحسان

هتشوف إزاي مراتك ................. هتعينك إنت كمان

قدملي مكة كولا ................. قاللي اتفضل وسمي

أحسن من سكة كولا ................. صدقني وخدها مني

قلتله طيب ياعمي ................. يسعدني أقولك إني

بطلب بنتك ونفسي ................. تناسبني وترضى عني

راح شادد فجأه لبسي ................. وقلب وشه وسألني

حافظ كم جزء يابني ................. وقاري كم كتاب

احكيلي كده عن مؤت ................. أوغزوة الأحزاب

وسمع كم حديث ................. في الأخذ بالأسباب

وكمان سمعلي آيه ................. ذكرت فيها الدواب

ولو شايفها صعبة ................. قللي بتاعة الذباب

واحكيلي حلم يوسف ................. وبراءة الذئاب

واخواته لما جولوه ................. دخلوا من أنهي باب

واديني فكرة برضه ................. بتقبض كم ثواب

وناوي ازاي تحسن أنا شايفك لسه شاب

وسأل نفسه وسألني ................. هيعوز إيه يعني مني؟

لو عندي كل حاجه ................. وديني مش شاغلني

أحسن لك تنسى بنتي ................. ومهرك مش لازمني

قلتله صبرك ياعمي ................. وبراحتك امتحنيي

بقى اما أسأل تجاوب ................. خليك دايماً فاهمني

سألتك وانت ساكت ................. خليتني أظن ظني

وفضل يسأل واجاوب ................. وعشان خاطرك عصرني

وظهرت النتيجة ................. وبفضل الله قبلني

قاللي مقبول في نظري ................. مبروك عليك ياسيدي

لكن في نظرها هي ................. نجاحك مش بإيدي

وهي زمانها راجعة ................. من تمرين السويدي

خليك قاعد شوية ................. استنا لما تيجي

هعملك من إيديا ................. كباية شاي صعيدي

سابني وقعدت أفكر ................. هل ممكن ترفضيني

طاب قولي حتى أفكر ................. مش يمكن تفهميني

وفضل مخي يلاعبني ................. يجيبني ويوديني

وخايف م المقابلة ................. مرعوب بينك وبيني

ودق الباب في ثانية ................. وشوفتك مرة تانية

مش قادر أنسى يومها ................. وفاكر كل ثانية

ونده والدك عليكي ................. عشان أول لقاء

دخلتي وشوفت وشك ................. عليه نور الحياء

نور والله فعلاً ................. مش نور بودرة وزواء

كان أول مرة أخاف ................. من فتنة النساء

أخلاقك مش عادية ................. وجمالك كان شفاء

قعدتي جنب والدك ................. وسألتيني وجاوبتك

وفكل مرة أجاوب ................. كنت باشوف ابتسامتك

ف أقول من جوه نفسي ................. يارب أكون عجبتك

وبعد شوية قمتي ................. ندهت عليكي مامتك

ورحتي دخلتي جوه ................. وراح وراكي والدك

وانا قلت مش مروح ................. غير لما أكون خطبتك

وابوكي جاني تاني ................. وقرب من وداني

لابس كرفته سوده ................. وبدله لون فراني

المنظر يعني كله ................. ميدلش ع التهاني

قلتله مالك ياعمي ................. من فضلك قول عشاني

عرقي غرقلي كمي ................. سايبني ليه أعاني

قاللي مستني إيه ................. فين إيدك إديهاني

البنت مش موافقة ................. تتجوز حد تاني

كان أول مرة أعرف ................. إزاي الناس بتفرح

سعادتي كات غريبة ................. مش ممكن هقدر أشرح

من كتر حبي ليكي ................. نويت أضحي وادبح

رحت اشتريت خروف ................. وكان خروف بينطح

ده أخيراً هبقى جوزك ................. وشجرة صبري تطرح

خطوبتنا كات بسيطة ................. مكانش فيها زيطة

وفرحنا كان في جامع .................ي عني مش خلطبيطة

ومامتك جت في يومها ................. ورقعت كام سويطة

هاتولي بنتي منه .................د ي مش فاهمة العبيطة

إنه هيخطفها مني ................. وهتوحشني الغتيتة

صعبت عليا مامتك ................. الموقف كان شديد

لكن فعلاً خطفتك ................. ورحنا مكان بعيد

فاكرة ولا انتي ناسية ................. أكيد فاكرة أكيد

من يوم ما بقيتي زوجتي ................. وانا متهني وسعيد

معايا ف كل يوم ................. ويوم لؤاكي عيد

عمرك ما دقتي نوم ................. وانا تعبان أو مريض

فلوسي كات بتكتر ................. والخير عندك يزيد

وعامله ليه دفتر ................. ومرتبه المواعيد

وبفضل الله قدرتي ................. وجبتيلي الوليد

وبعديها بشوية ................. جبتيلنا عليه يزيد

وبعديه جت سمية ................. وآخرهم كان حميد

بدعيلك كل يوم ................. وأفضل أعيد وازيد

ربيتي عيالي دول ................. ع القرآن المجيد

طول عمرك وانتي صافية ................. قلبك لون الجليد

أخلاقهم مش عادية ................. طلعنلك مش بعيد

وليد دلوقتي ضابط ................. ومعاه رتبة عقيد

ودعوة قلبي صابت ................. ويزيد أهو مات شهيد

وبنتك صيدلانية ................. وحميد أصبح معيد

الله برحم أبوكي ................. راجل من نوع فريد

كل اللي قاله فيكي ................. أنا عشته بالتحديد

عشت معاكي ف حكاية ................. أحلى وأجمل رواية

حكايتي كات معاك ................. وحكايتك كات معايا

اديتك كل عمري ................. وهمك كان رضايا

وعمرك خدته منك ................. وقربك كان دوايا

وخلاص العمر راح ................. راحت أيام صبايا

ومسافر رحله صعبة ................. وزادي مش كفايه

مش عاوز أشوف دموعك ................. بالذات ف يوم عزايا

أنا عارف إنتي عارفة ................. إن الموت مش نهاية

دي لسة الرحلة طالعة ................. والموت خط البداية

إدعيلي يمكن أوصل ................. وأشوف هناك حمايا

أنا عارف إنه فيها ................. محجوزله هناك سرير

وسلامي في النهاية ................. أنا خلصت الحكاية

لو يوم فكرتي فيه ................. إقري شعري وغنايا

وأمانه ف كل مرة................. تدعي لي بالهداية

عسى ربي بدعائك................. يغفر ليا الخطايا


* * *منقول
عجبتني قوي قلت لازم أجيبلكم

هناك 40 تعليقًا:

أحمد سعيد بسيوني يقول...

جميلة جداً

بحق

جوجو يقول...

السلام عليكم

الله بجد اسلوبك رائع

تحياتى

mohamed ghalia يقول...

جميلة أووووووووووووى
بجد تستحق انك تعمليها بوست
احسنتى الإختيار
دمتِ فى سعادة

Unknown يقول...

السلام عليكم
وبدأت حملة ( مين هيفطر أكتر )
هل ستشاركنا وتأخذ الأجر معنا
هيا اذن لنشمر السواعد ولنعلى الهمم
ولنخلص لله النوايا
الم تسمع قول النبى صلى الله علية وسلم ... عن زيد بن خالد الجهني قال : قال صلى الله عليه وسلم : " مَن فطَّر صائماً كان له مثل أجره غير أنه لا ينقص من أجر الصائم شيء "
أدخل على هذا الرابط وشاركنا
http://3amood.blogspot.com/

قلم رصاص يقول...

السلام عليكم

اختيار رائع وموفق

دمتي في ابداع وتميز

في حفظ الله

حياتي كلها لله يقول...

السلام عليكم
أحمد سعيد بسيوني

جزاك الله خيرا

تحياتي
سلمي

حياتي كلها لله يقول...

السلام عليكم

جوجو
يا بنتي ده مش أسلوبي
أنا طبعا أسلوبي أحسن من كده بكتير "تواضع (:"

بس أنتي فينك مش باينة خااالص وحشاني كتيييييييييير
تحياتي
سلمي

حياتي كلها لله يقول...

السلام عليكم

محمد غالية

جزاك الله خيرا
ياااااااااارب بجد أدوم في سعادة

تحياتي
سلمي

حياتي كلها لله يقول...

السلام عليكم

أحمد بدر الجين

اكيد معاكم إن شاء الله

حدخل حااااللا

تحياتي
سلمي

حياتي كلها لله يقول...

السلام عليكم

قلم رصاص
و الله بجد جزاك الله خيرا
حضرتك بتآخد ثواب في عالي جدا
لأنك بترفع معنوياتي السما

جزاك الله خيرا
تحياتي
سلمي

سمية قهوة يقول...

فعلا حلوه أوي تستاهل النقل

إسراء يقول...
أزال المؤلف هذا التعليق.
إسراء يقول...

سيبنا من حبيتك لإلتزامك دلوقتي رغم روعتها
فينك مش بنشوفك
ووحشاني جدا جدا جدا
على فكرة لازم تلحقي نفسك
أحسن انا خلاص قربت انسى شكلك ووحشاني جدا
وزعلانة منك

ببعتلك سلام مع يسر بيوصل ولا لأ

غير معرف يقول...

السلام عليكم

ده منين ده


هو بجد حلو اوى اوى اوى

والله تسلم الايادى



بس طويل اوى

انا قارت نصفه وهابقى ارجح اجيب النصف الثانى باذن الله


دمتم بكل خير

ودعواتكم

بستان الحب يقول...

حبيبتى كل الابيات رائعه وأروعها (حتوحشنى الغتيته )دمتى فى سعاده يا ؟؟؟

طلاب من أجل مصر يقول...

بجد أسلوبك حلو اوى

انا اول مره ازور مدونة حضرتك

وان شاء الله مش الاخيرة

غير معرف يقول...

إيه الروعة دى يا سلمى

تحفة أوى

انا كل فترة لازم اقراه إن شاء الله

حياتي كلها لله يقول...

السلام عليكم

سمية

إيه يا بنتي الإسم الجبار ده قهوة آه ياني

بس بجد حلو أووووووووي

مبسوطة أوي بزيارتك و مستنياكي علي طول

تحياتي
سلمي

حياتي كلها لله يقول...

السلام عليكم

إسراء

مش ممكن بجد مش معقوووووووول
أول مرة تجيلي ...

لأه الخاينة يسر مبتوصليش حاجة

بس متقلقيش أنت حتزهقي مني جدااااااا

بجد و الله حآجي الدار علشان أحفظ بقي

أستنيني قريب جدااااااااا

تحياتي
سلمي

حياتي كلها لله يقول...

السلام عليكم

خريجاوي صاحب عيادة أسنان

ده منين ده
بالسهولة ده "ده سر المهنة و بعدين أنا عندي مصادري الخاصة "

بس ماشي لقيته علي الفيس بوك

ربنا ييسرلك أمورك
تحياتي
سلمي

حياتي كلها لله يقول...

السلام عليكم

بستان الحب

منوراني اي طنت و الله

سكتي ليه يا طنت متكملي
عادي و الله
أنا روحي المعنوية عالية جدااااااااا
و بعدين أصلا الإعتراف بالحق فضيلة

*************************
حتوحشني الغتيته دمتي في سعادة يا عبيطة
*************************
طيب و الله لايقة جدااااااااا

مش تحياتي خالص
مش سلمي كمان

حياتي كلها لله يقول...

السلام عليكم
طلاب من أجل مصر

إيه ده مش مصدققة نفسي
طلاب مصر كلهم هنا عندي

منورني
بس للأسف ده مش أسلوبي ده منقوله

تحياتي
سلمي

حياتي كلها لله يقول...

السلام عليكم
أنا و دماغي
عاملة إيه يا قمر وحشاني موووووووووووووت

ليه بقي لازم كل فترة تقريها
أعترفي و أقولي الصراحة (:

تحياتي
سلمي

محمد بن خالد الحليبي يقول...

جميلت هي تلك القصيدة ..

وفقك الله وسدد خطاك وأصلحك ..

تقبلوا تحياتي ...

كريم مصطفي سيد يقول...

السلام عليكم
شعر جميل وجزيتي خيراا
وكل عام وانتي بخير

غير معرف يقول...

فات اكتر من اسبوع علي اخر بوست

احمد لاشين

حياتي كلها لله يقول...

السلام عليكم
أ/محمد بن خالد الحلبي

جزاك الله خيرا علي رأيك و سعيدة جدا بمرورك الكريم
تحياتي
سلمي

حياتي كلها لله يقول...

السلام عليكم
أ/كريم مصطفي السيد

جزاك الله خيرا
ف يأنتظارك دئما
و حضرتك بخير

تحيايت
سلمي

حياتي كلها لله يقول...

السلام عليكم
أ/أحمد لاشين

############################
فات اكتر من اسبوع علي اخر بوست

###############################

لأه حضرتك متفهمنيش صح
ريما مرجعتش لعادتها القديمة
و الله بس هو حصل ظروف سافرنا و الكمبيوتر باظ

أنا آسفة بجد

إن شء الله النهاردة حنزل بوست جديد

في أنتظار تعليق ضرتك

تحياتي
سلمي

غير معرف يقول...

حمدا لله علي سلامة حضرتك
وربنا يهدي الكمبيوتر
وتنوري مدونتك بحسن اختيارك لموضوعاتك
وتسعدي قرائك

جزيتي خيرا

احمد لاشين

حياتي كلها لله يقول...

السلام عليكم

أ/أحمد لاشين

جزاك الله خيرا
هو بس الإسم مش غريب علي و الله
أنا أكيد عارفة حضرتك صاحب أنه بلوج
بس مش متذكرة للأسف !!

أصل كمان حضرتك بتدخل غير معرف !!

غير معرف يقول...

ربنا يكرمك يا دكتورة سلمي
انا بلا بلوج
او بمعني ادق
مفيش بلوج عمرت فيه
ولو تابعت اي 1 منهم هأدخل بمعرفه
ومشكلتي ان كل سنة باعمل بلوج في عيد ميلادي
ومبيعجبش حد طبعا
ربنا يكرمك في انتظارك ومتابع كل جديد

احمد لاشين

حياتي كلها لله يقول...

ومبيعجبش حد طبعا
*******************
لأه أنا مش موافقة خالص علي الكلام ده و منتظرة بلوج حضرتك الجديدة ..الي حتعمر العمر كله بإذن الله


تحياتي
سلمي

غير معرف يقول...

حاضر يا دكتورة
علم وجاري التنفيذ

احمد لاشين

طالبه اخوانيه يقول...

بجد رائعه

بوركت يد من نقل أختى الحبيبه

فجر يقول...

جمييلة أوي دي يا سلمى
إنت كل حاجة بتكتبيها هادفة ما شاء الله
وعلى فكرة أنا لسة عاملة مدونة أنا وجهاد سوا بس في حاجات مش عارفاها
يعني مثلا:
الناس بتعرفها إزاي؟
كنت حكلمك أسألك بس تليفونا بايظ
مي يا سلومة

حياتي كلها لله يقول...

السلام عليكم

طالبة غخوانية
سعيدة جدا ااا بزيارتك ويارب دايما

حياتي كلها لله يقول...

السلام عليكم

فجر

مش معقول
بجد مبسوطة بيكي جداااااا
أظن بقي خلاص كده إحنا ظبطنا كل حاجة في النليفون

غير معرف يقول...


لأن نقل الأثاث ليس بالأمر السهل، أو بسيطة لهذه المسألة، إنها مهمة تحتاج إلى تفانيك الكامل والمزيد من الخبرة ، ومع ذلك ، قد لا يكون نقل أثاثك بنفسك فكرة رائعة، متعلقاتك هي أكثر هشاشة مما تبدو عليه ، لا يهم إذا كانت كبيرة وثقيلة - فلا يزال من السهل إتلافها، وهذا شيء تريد تجنبه بأي ثمن، مع نقل الأثاث لدينا في خدمتك - يمكنك نقل أثاثك الثمين بأكثر الطرق أمانًا، والأهم من ذلك - أنك ستتحرك بسهولة،
دينا نقل عفش بابها

ارخص شركة نقل عفش بابها

افضل شركة نقل اثاث بخميس مشيط

double blanket cover يقول...

انا قارت نصفه وهابقى ارجح اجيب النصف الثانى باذن الله
king size down comforter duvet cover
king size duvet width